يصف باسل تجربته في التمثيل بأنها “رحلة مستمرة تتطور مع كل دور جديد”. لم يدخل المجال من باب الدراسة الأكاديمية التقليدية، بل من باب “الحب والفضول والتجربة”، على حد تعبيره. ويضيف: “كل شخصية أديتها كان لها تأثير عليّ، سواء نفسيًا أو فكريًا، وكل مرة بكتشف في نفسي جانب جديد ما كنتش أعرفه. التمثيل علّمني التعاطف، وخلاني أعيش حياة ناس ما كنتش هعرفهم في حياتي العادية.” لكن حضوره أمام الكاميرا ليس مقصورًا على التمثيل، فباسل له خبرة أيضًا كمذيع. وهنا يوضح الفرق: “الفرق كبير جدًا رغم إن الكاميرا واحدة. كمذيع أنا بكون نفسي — باسل زي ما هو — بعفويتي وطريقتي. لكن كممثل أنا شخص آخر تمامًا. المذيع لازم يكون حقيقي، والممثل لازم يكون صادق في كذبه. الاثنين فيهم مسؤولية، لكن كل واحد ليه أدواته.”
أما عن الأدوار التي يحلم بتجسيدها، فيقول: “أنا دايمًا أجري ورا النص مش ورا نوع معين من الأدوار. لكن حاليًا متحمس جدًا لفكرة أفلام السير الذاتية لشخصيات عربية عظيمة أثرت في العالم. وعندي شغف بالحروب والخيول والسيوف، التاريخ الملحمي اللي فيه شرف وتضحية وقوة.” ويعترف بأن شغف الممثل يتغير مع كل مرحلة من حياته. وفي رؤيته للإعلام الترفيهي اليوم، يرى باسل أن السوشيال ميديا غيرت قواعد اللعبة: “الناس بقت تدور على الصدق والعفوية أكتر من الإخراج الضخم. النجم الحقيقي دلوقتي مش بس اللي عنده موهبة، لكن اللي بيعرف يتواصل مع الناس ويلمسهم. الإعلام ممكن يصنع نجم في يوم ويخفيه في اليوم اللي بعده، فلازم تبقى حقيقي عشان تستمر.”
وعن التوازن بين المهنية الإعلامية ومتطلبات الجاذبية أمام الكاميرا، يؤكد: “المهنية مش ضد الجاذبية، هما بيكملوا بعض. لما تكون صادق، متواضع، ومريح في حضورك، ده في حد ذاته جاذبية. ما بحبش أتصنع، بحاول أكون باسل بعيوبه ومميزاته، لكن بحترم الكاميرا والجمهور.” أما علاقته بالموضة، فيراها لغة للتعبير عن الذات: “الموضة بالنسبة لي مش مجرد لبس، هي طريقة بنعبر بيها عن نفسنا من غير ما نتكلم. بحب ألبس كويس وأهتم بالتفاصيل والراحة، ومش بهتم بالتريند بقدر ما ألبس اللي يناسبني ويعبر عني.”
ويضيف مؤكداً أن الموضة وسيلة وليست فرضًا: “اللبس بيعكس مودك وطاقتك. الشخص اللي بيلبس لنفسه مش للناس هو شخص واثق. الموضة مش فرض… لكن ستايلك هو اللي بيفرق.” وعن دور الموضة في تكوين صورة النجم اليوم، يوضح: “الموضة جزء أساسي من صورة النجم، مش بمعنى البراندات أو المبالغة. الناس بتحب النجم اللي عنده ستايل خاص. اللبس الصح في الوقت الصح ممكن يقول عنك أكتر من كلام كتير، وفي عالمنا دلوقتي صورتك بتتكلم قبلك.”
وحين سُئل عن عناصر الرجل العصري، اختصرها قائلاً: “البساطة، والذوق، والنظافة. الاهتمام بالنفس مش رفاهية، هو احترام. الرجل العصري لازم يكون مثقف، ريحته حلوة، جسمه سليم، لبسه بسيط وأنيق، وكلامه موزون. مش لازم يبقى فاشنيستا، لكن لازم يعرف يقدّر نفسه.” ويؤكد باسل أن صورة الرجل بحاجة لإعادة تعريف بعيدًا عن النمطية التقليدية: “الحنان مش ضعف، والذوق مش نقص، والتعبير عن المشاعر مش عيب. الرجل العصري لازم يبقى قوي لكن حساس، ثابت لكن مرن، ناجح لكن متواضع.” بهذه الرؤية المتوازنة بين الفن والإعلام والموضة، يرسم باسل ملامح شخصية معاصرة تُلهم جيلاً جديدًا من الفنانين والإعلاميين، وتضعه في مكانة مميزة بين نجوم عصره.
